Бүгүн, 15-декабрда Бишкекте Юстиция министрлигинин алдындагы Пробация департаменти, Акыйкатчы аппаратынын кызматкерлери, Жогорку Кеңештин депутаттары жана укук коргоочулардын катышуусунда үй-бүлөлүк зомбулуктун алдын алуу маселелери талкууланды.
Диалогдук жыйында турмуш-тиричиликте зомбулук жасаган жарандар үчүн коррекциялык программаларды колдонуу жолу, пробация маселеси талкууланды.
Пробация департаментинин статистикалык маалыматына ылайык, 2022-жылы 5 жаран пробациялык көзөмөлгө алынса, 2023-жылы 10 адамга пробациялык көзөмөл чарасы колдонулган.
Жогорку Кеңештин Винера Райымбачаева зордук-зомбулук менен жапа тырмак күрөшүү керектигин айтты.
«Зордук-зомбулук маселеси абдан курч бойдон калууда. Акыркы Аселдин окуясы баарыбыздын жүрөгүбүздү оорутту. Мындай окуялар кайталанбаш керек»,-деди депутат.