Бүгүн, 19-майда Жогорку Кеңештин комитет жыйынында парламентке өтүү үчүн босоголук чекти 5 пайызга төмөндөтүү мыйзам долбоору каралды.
Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти комитетинин депутаттары бул мыйзам долбоорун четке какты. 2 депутат «макул», 12 эл өкүлү «каршы» деп добуш берди.
Мыйзам долбоорун Мирлан Жээнчороев, Исхак Масалиев, Жанар Акаев, Наталья Никитенко, Дастан Бекешев демилгелеген.
Кошумчалай кетсек, өткөн жумада Жогорку Кеңеште 9 пайыздык босого чекти 7 пайызга төмөндөтүү боюнча мыйзам долбоору колдоо тапкан эле.