Жыл башынан бери 222 бала зомбулукка кабылган

Жыл башынан бери 222 бала зомбулукка кабылган. Бул тууралуу Эмгек, социалдык камсыздоо жана миграция министри Кудайберген Базарбаев билдирди.

Анын айтымында, Кыргызстанда акыркы үч жыл ичинде балдарга карата зомбулук көбөйдү.

«2021-жылы жүз миңден ашык биздин жарандар чет өлкөгө иштеп кетишкен, балдары жакын туугандарында калган. Бүгүнкү күндө өлкөнүн ар бир районунда атайы комитеттер иш алып барат. Алар 476 миң үй-бүлөгө барып, балдардын жашоо шарты менен таанышып келишкен. Анын жыйынтыгында зомбулук фактылары да аныкталды. 2022-жылдын эсебинен балдарга карата зомбулуктун 222 учуру катталды. Аталган факт боюнча чаралар көрүлдү. Алсак, Сокулукта сабалып, ушул тапта Бишкектин № 3 балдар ооруканасында жаткан Егордун абалы менен тааныштык. 2 жаштагы бөбөккө тиешелүү жардамдар берилип жатат»,-деди министр.

Эске салсак, 3-февралда Сокулук райондук аймактык ооруканасына 1 жаш 8 айлык наристе денесиндеги көгала тактар менен алып келинген. Окуяга байланыштуу кылмыш иши козголуп, баланы сабоого шектүү катары 34 жаштагы адам кармалган.