Бишкек.14.01.2019.Govori.TV.
Ысык-Көл облусуна караштуу Ананьево айылындагы православ көрүстөнүндөгү эстеликтерди талкалоо фактысы боюнча Ысык-Көл райондук ички иштер бөлүмү тергөө тобун түзүп, иликтөө иштерин баштады. Бул тууралуу Ысык-Көл облустук ички иштер башкармалыгынын басма сөз катчысы Сталбек Усубакунов билдирди.
«Бул факты Ысык-Көл райондук ички иштер бөлүмүндө кылмыштардын жана жоруктардын бирдиктүү реестринде катталган. Жоруктар жөнүндө кодекстин 131-беренесинин негизинде сотко чейинки өндүрүшкө алынган. Азыр бул факты боюнча бардыгы катталып, тийиштүү кызматтарга муну кылган адамдардын тек-жайын аныктоо боюнча тергөө тапшырылган», -деди Усубакунов.
Ананьево айылындагы православ көрүстөнүндөгү жыгач кресттер талкаланганы 12-январда белгилүү болгон. Аларды 11-январдын кечинде белгисиз кишилер бузуп, сындырып кеткени айтылган. Жалпысынан православ мүрзөсүндө 91 эстелик талкаланып азыркы мезгилде аны оңдөө иштери жүрүүдө.