Муфтийликке талапкерлердин арызы 17-февралдан тартып кабыл алынат (шарттары)
Муфтийликке талапкерлердин арызы 17-февралдан тартып кабыл алынат (шарттары)
16 Бирдин айы 2021 9:33 Бишкек Govori.TV
Үстүбүздөгү жылдын 17-февралынан тартып муфтийликке талапкерлердин арызы кабыл алынат. Бул тууралуу муфтияттын басма сөз кызматынан кабарлашты.
Маалыматка ылайык, 11-февралда Аалымдар кеңешинин жыйыны өтүп, 2021-жылдын 5-апрелинде Кыргызстан мусулмандарынын VII курултайын өткөрүү чечими кабыл алынган.
Кыргызстандын муфтийи болууну каалагандар үчүн коюлган талаптар:
Кыргыз Республикасынын Конституциясы, мыйзамдары жана демократиялык коомдун негизги принциптери жөнүндө кеңири түшүнүгү бар;
Салтуу Ислам болуп саналган Матуриди акыйдасын жана Ханафий мазхабын карманган;
Жогорку финансылык билимге ээ;
Куран, тафсир, акыйда, хадис, фикх жана башка Ислам негиздерин жетиштүү деңгээлде билген (талапкерге артыкчылык берилет);
Адеп-ахлагы бийик, адилеттүү, адамгерчиликтүү, такыба, гумандуу, чынчыл жана калыс;
Тиешелүү мамлекеттик органдар тарабынан мурда соттолбогон;
Эч кандай саясий партияларга мүчө болбогон;
Мамлекеттик финансылык кызматтарда же мамлекеттик эмес финансылык мекемелерде беш (5) жылдан кем эмес иштеген;
Уюштуруучулук жана жетекчилик жөндөмү бар;
Мамлекеттик тилде эркин сүйлөгөн жана жаза билген Кыргыз Республикасынын ар бир жараны Кыргызстан мусулмандарынын борбордук текшерүү комиссиясынын төрагалыгына талапкер катары каттала алат.
Каттоого катышуу үчүн керектүү документтер:
Талапкердин Каттоо комиссиясынын төрагасынын наамына жазган арызы;
Кадрларды каттоо баракчасы 4 даана ¾ өлчөмүндө сүрөтү менен (Личный листок) байланыш маалыматтары, жашаган дареги сөзсүз түрдө көрсөтүлүшү керек);
Паспортунун көчүрмөсү (ID карт) ;
Резюме (Илимий жетишкендиктерине, иш тажрыйбасына жана алган сыйлыктарына басым жасалат);
Мүнөздөмө (акыркы иштеген мекемесинен);
Жогорку финансылык билимин тастыктоочу документтеринин көчүрмөлөрү;
Эмгек китепчесинин көчүрмөсү;
Соттолбогондугу тууралуу аныктама каты.
Документтер төмөнкү даректе кабыл алынат: Бишкек ш., Гоголь к. 57, КМДБнын / муфтияттын имараты, 2-кабат. КМ Аалымдар кеңешинин катчылык бөлмөсү.
Кабыл алуу убактысы: Ишемби, жекшемби күндөрүнөн сырткары, аптанын бардык күндөрү саат: 11:00 – 16:00.
Документтер [email protected] электрондук почтасы аркылуу да кабыл алынат. Электрондук дарекке жиберүү жолу менен катталгандар документтеринин түп нускаларын (оригиналдарын) 17-мартка чейин делонун ичинде тапшырууга тийиш. Документтерди алып келген адам үчүн талапкердин ишеним каты талап кылынат.