Мамлекеттик салык кызматынын төрагасы Алмамбет Шыкмаматов Орусиянын премьер-министри Михаил Мишустиндин Кыргызстандагы оруссиялык ишкерлерге кысым көрсөтүү боюнча билдирүүсүнө комментарий берип, мамлекеттик органдардын жогорку жетекчилиги негизсиз дооматтарды коюп жатканын айтты.
«Өлкө жетекчилиги жөнүндө айтып жатып, Мишустин мырза так эместикке жол берди, ал эми «опузалап алуу» деген сөз өтө аша чапкандык. Экономикалык маселелерге саясий боёк берилди деп айта алабыз. Балким, бул Михаил Мишустиндин объективдүү маалыматтын жоктугу менен шартталган. Өлкө жетекчилиги тескерисинче масштабдуу реформаларды жүргүзүп, коррупциялык схемаларды жоюу жана бардык тармактарда ачык-айкындуулукту камсыздоо боюнча олуттуу чараларды көрүүдө. Бул принципиалдуу маселе жана мындай талаптар бардык мамлекеттик органдарга коюлуп жатат», — деди Шыкмаматов
Ал бажы тармагын мисал келтирди: «2016-жылы ЕАЭБдин жалпы бюджетине 12 миллиард 244 миллион сом которгон, ал жактан 13 миллиард 94 миллион сом түшкөн.
2017-жылы ЕАЭБдин жалпы бюджетине 12 миллиард 515 миллион сом которуп, ошол эле жылы 15 миллиард 358 миллион сом кайтарып алдык.
2022-жылы биздин трансферттердин суммасы 20 миллиард 506 миллион сомду, ЕАЭБ бюджетинен түшкөн киреше 16 миллиард 242 миллион сомду түздү. 2023-жылы 50 миллиард 932 миллион сом которуп, 25 миллиард 481 миллион сом кайтарып алдык”.
Анын айтымында, 2022-жылдан бери Кыргыз Республикасынын бажы кирешелеринин жалпы бюджетине чегерүүлөрдүн көлөмү кыйла өстү, ал эми Кыргыз Республикасынын кайра бөлүштүрүүдөгү үлүшү эки эсеге кыскарды – бул Кыргызстандын бажы тармагындагы коррупциялык схемаларга каршы күрөштүн натыйжасы.
«Ошол эле процесстер салык системасында болуп жатат. Фискалдык саясатты жакшыртуунун аркасында салык чогултуу жылдан-жылга көбөйүүдө. 2020-жылы 62 миллиард 958 миллион сом, 2023-жылы 296 миллиард сом чогултулган, 2024-жылы бул көрсөткүч 342 миллиард сомго жеткен. Бизде “бул компания тигиндей, ал эми бул компания башканыкы” деген айырмачылык жок. Биз салык төлөөчүлөрдү биздин өлкөдөн, ири державадан же кичинекей мамлекеттен деп бөлбөйбүз. Мыйзамда белгиленген салык эрежелери бардыгына бирдей колдонулат жана аны баары аткарат. Мыйзам баарына бирдей, салык төлөө ыйык милдет. Эгерде кимдир бирөө атайылап салыкты жашырууга аракет кылса, тиешелүү органдар улуттук мыйзамдардын чегинде иш алып барышат. Россияда да бул принциптер бузулбас. Мен Михаил Владимирович Россиядагы эң ийгиликтүү салык реформаларынын биринин “атасы” катары муну абдан жакшы түшүнөт деп ишенем”, — деп белгиледи ал.
Шыкмаматов салык төлөөчү салык органдары тарабынан колдонулган санкцияларга макул болбосо, анын укугун коргоо боюнча эл аралык стандарттарда каралган бардык механизмдер бар экенин айтты. Бул салык органдарынын апеляциясы жана сотко кайрылуу.
«Ошондуктан, бул кадыресе экономикалык маселе жана эки өлкөнүн стратегиялык мамилесине таасирин тийгизбеши керек деп эсептейм. Кыргызстанда чет элдик инвесторлор жана ишкерлер үчүн бардык мыйзамдуу шарттар түзүлүп, эч кимге негизсиз артыкчылык берүүгө болбойт. Ушуга байланыштуу бул маселени мынчалык жогорку деңгээлде ашыкча саясатташтыруу туура эместей сезилет», — деди Мамлекеттик салык кызматынын башчысы.
Эскерте кетсек, Орусиянын премьер-министри Михаил Мишустин Кыргызстандын Министрлер кабинетинин төрагасы Адылбек Касымалиев менен Алматыда жолукканда кыргызстандык мамлекеттик органдар орусиялык компанияларга «кысымын жана негизсиз дооматтарын» токтотушу керектигин талап кылды.
«Кемпир-Абад» ишинин дагы бир фигуранты Атай Бейшенбек Улуттук коопсуздук кызматынын мурдагы башчысы Камчыбек Ташиевдин билдирүүсүнө …
Жогорку Кеңештин 4-февралдагы жыйынында сөз алган депутат Кундузбек Сулайманов менчик автомектептердин маселесин айткан депутаттардын аракети …
Кыргыз Республикасынын Президенти Садыр Жапаров бүгүн, 28-январда, “Ишкердик субъекттерге салык контролун жүргүзүүгө убактылуу тыюу салууну …
Минск Кыргызстанга күйүүчү май жеткирүүгө жардам берди. Бул тууралуу Беларус президенти Александр Лукашенко Бишкектеги ЖККУ …
Россиянын өкмөтүнүн төрагасы Михаил Мишустин Чолпон-Ата шаарында бүгүн, 15-августта өтүп жаткан Евразия өкмөттөр аралык кеңешинин …
Чолпон-Ата шаары, Ысык-Көл облусу, 14-август — Кыргыз Республикасынын Министрлер Кабинетинин Төрагасы-Кыргыз Республикасынын Президентинин Администрациясынын Жетекчиси …
