Россиянын Москва шаарында кыргызстандык таксист менен уруша кеткен жолтандабастын айдоочусу ок чыгарды. Бул тууралуу Кыргызстандын Россиядагы элчилиги билдирди.
Элчилик таксист Кыргызстандын 23 жаштагы Алманбет Абдрахманов аттуу жараны экенин билдирди.
“Мекендеш окуя болгондон кийин ооруканага жаткырылган. Аталган маселе элчиликтин көзөмөлүнө алынды. Кыргызстандын жаранына тиешелүү консулдук жардам берилет”, — деп айтылат маалыматта.
Россиянын ЖМКлары окуя Чоң Грузин көчөсүндө болгонун жазып чыкты. Анда ок чыгарган айдоочу из жашырып кеткени айтылууда.