Бир сутка ичинде коронавирус жуктуруп алган медициналык кызматкерлер катталган жок. Бул тууралуу бүгүн,18-апрелде онлайн маалымат жыйында саламаттыкты сактоо министринин орун басары Нурболот Үсөнбаев билдирди.
Анын айтымында, республика боюнча COVID-19 диагнозу менен медициналык кызматкерлер саны 116 учур бойдон калды.
Кошумчалай кетсек, 18-апрелге карата Кыргызстанда дагы 17 адамдан коронавирус инфекциясы аныкталып, илдетке чалдыккан 16 бейтап ооруканадан чыгарылды. Өлкөдө коронавирус жуктургандардын саны 506 адамга, айыккандардын саны 130 адамга жетти.