Бишкектеги СИЗО-1де эркек киши каза болду. Бул тууралуу маалыматты Govori.TVга Жазаларды аткаруу кызматынан тастыкташты.
Маалыматка ылайык, 28-август күнү таңкы саат 05.40 чамасында СИЗО-1де 1987-жылы туулган, мурда соттолгон жаран эс-учун жоготкон. Ал үстүбүздөгү жылдын 26-августунда Чүй районундагы №26 колониядан СИЗО-1ге киргизилген.
«Нөөмөткө чакырылган фельдшер К.И.Мге биринчи жардам көрсөткөн. Саат 06:26да келген тез жардам кызматы шектүүнүн каза болуп калганын аныктаган. Кыргыз Республикасынын Юстиция министрлигинин Жазаларды аткаруу кызматынын Тергөө башкармалыгы тарабынан Бишкек шаардык медициналык экспертизанын республикалык борборунун кызматкерлери тарабынан соттук-медициналык экспертиза дайындоо жөнүндө токтом чыгарылган»,-деп айтылат маалыматта.
Учурда КР Юстиция министрлигинин Жаза аткаруу кызматынын Тергөө башкармалыгы тарабынан тергөөгө чейинки текшерүү иштери жүргүзүлүүдө.