Трамп Путин жана Зеленский менен 22-августта саммит өткөрүүнү көздөп жатат

Ак үйдүн башчысы 22-августта Россиянын жана Украинанын президенттери менен үч тараптуу саммит өткөрүүнү каалайт, деп жазат Axios.

АКШнын президенти Дональд Трамп Россиянын президенти Владимир Путин менен жолугушуусунун жыйынтыгы боюнча Украинанын президенти Владимир Зеленскийге жана телефон аркылуу сүйлөшүүгө катышкандарга кийинки жума күнү, 22-августта, үч мамлекеттин башчыларынын катышуусунда саммит өткөрүүнү көздөп жатканын билдирди. Бул тууралуу ишемби күнү, 16-августта, Axios басылмасына анын эки ишенимдүү булагы билдирди.

Кремлдин башчысы мындай жолугушууну өткөрүүгө эл алдында убада берген жок деп белгиленет басылмада. Мындан тышкары, Путин Трампка Аляскадагы жолугушуусунда Украина үчүн «коопсуздук кепилдиктерин» талкуулоого даяр экенин, бирок кепилдик берүүчү катары Кытайды көрөрүн айткан деп айтылат.

Путиндин Трамп менен жолугушууда айткан «тынчтык» шарттарына Украинанын аскерлерин Украинанын чыгыш эки аймагынан толугу менен чыгаруу кирген, деп билдирди Axios’ко эки булак. Америкалык лидердин европалыктар менен телефон аркылуу сүйлөшүүсүнөн кабардар болгон булактардын биринин айтымында, Россиянын президенти Трампка Донецк облусунан украин аскерлерин чыгаруунун ордуна Херсон жана Запорожье облустарындагы чабуулун токтотууга даяр экенин «жеңилдик» катары билдирген.

«Чындыгында, Россия бул аймактарда бир канча убакыттан бери эч кандай ийгиликке жетише элек», — деп белгиленет жарыяда.

Орус аскерлери согуштун алгачкы күндөрүнөн тартып басып алган Запорожье атомдук электр станциясынын тагдыры тууралуу булактар эч нерсе айтышкан жок.

Мындан тышкары, Ак үй башчысы телефон аркылуу сүйлөшүүгө катышкан европалык лидерлерди 18-августта Ак үйдө Зеленский менен боло турган жолугушуусуна кошулууга чакырды, деп кошумчалашты Axios’тун булактары.

Өз кезегинде Reuters агенттиги 16-августтун кечинде Трамп европалык лидерлерди жана Зеленскийди Путиндин Украинага коюлган талаптары менен тааныштырганын ырастады. Ал талаптарга ылайык, Украина Россия басып ала албаган Донецк облусунун бөлүктөрүн согушсуз Россияга өткөрүп бериши керек болчу. Reuters агенттигинин маалыматы боюнча, Украинанын президенти бул талаптарды четке каккан. Буга чейин Зеленский Россияга «жер берилбейт» деп бир нече жолу билдирген.

Financial Times (FT) басылмасынын маалыматы боюнча, учурда Россиянын аскерлери Донецк облусунун аймагынын болжол менен 70%ын көзөмөлдөп турат. Ошол эле учурда, Украинанын көзөмөлүндө калган калктуу конуштар Украинанын Куралдуу күчтөрүнүн операциялары жана чыгыш фронтундагы коргонуу үчүн чечүүчү мааниге ээ, деп белгилейт FT.