Чүй облусунун Жайыл районунун жана Кара-Балтанын шаарынын аймагындагы мүмкүнчүлүгү чектелген балдарга карантин убагында гуманитардык жардам берилбей жатат. Бул тууралуу Govori.TVга мүмкүнчүлүгү чектелген балдардын энелери билдирди.
Алардын айтымында, жардамга муктаж үй-бүлөлөр Кара-Балта шаарынын мэри Данияр Шабдановго жана Жайыл районунун акими Турусбек Ногоевго бир канча жолу кайрылып, бирок жыйынтык чыкпай жатканына нааразы.
«Бүгүн, 6-май күнү 60га жакын энелер Кара-Балта шаарынын мэриясынын алдына келдик. Бирок мэриянын кызматкерлери кабыл албай жатышат. Буга чейин Жайыл районунун Алексеевка айылындагы мүмкүнчүлүгү чектелген 3 балага гуманитардык жардам берилди деп жалган маалыматты базага киргизшкен. Бирок алардын ата-энелери жардам берилбегенин айтып акимчиликке кайрылышкан. Мындан сырткары Полтавка айылындагы мүмкүнчүлүгү чектелген баланын энесине жардам келбегенин айтып чыкканда, айыл өкмөт башчы участковый менен барып коркутуп кетиптир», — дешти алар.
Гуманитардык жардам күтүп турган энелердин бири Монолдорова Айнура атайы мүмкүнчүлүк чектелген балдарга берилген жардамдын жетпей жатканына нааразы болууда.
«Өкмөт ушундай жарандардын аярлуу катмарына жардам бербегенде, кимге берет», — деди ал.
