Жактоочу: Мадумаровдун ишинде 65 күбө көрсөтмө берет

Бүгүн, 6-февралда Бишкектин Биринчи май райондук сотунда «Бүтүн Кыргызстан» фракциясынын лидери, депутат Адахан Мадумаровдун иши каралууда.

Ишти караган судья Мирбек Сатарбек уулу. Соттук процесске ЖМК өкүлдөрү киргизилген жок.

Маалым болгондой, бүгүнкү отурумга күбө катары Коопсуздук кеңешинин мурдагы катчысы Токон Мамытов, Баткен облусунун мурдагы губернатору Мамат Айбалаевдер көрсөтмө берүү үчүн келген.

«Иш боюнча жалпы 65 күбө суралат. Анын 34 сурак берип бүттү», — деди Ольга Жукова.

Жукова мындан сырткары бүгүн Мадумаровду үй камагына чыгаруу өтүнүчүн киргизе турганын кошумчалады.

Эске салсак, Мадумаров өткөн жылдын 2-сентябрында кармалып, менен Улуттук коопсуздук боюнча мамлекеттик комитеттин (УКМК) тергөө абагына 24-октябрга чейин камалган.

Ага кыргыз-тажик чек арасындагы тилке боюнча 2009-жылы протоколго кол койгону үчүн “Мамлекеттик чыккынчылык” деген берене менен айып тагылган.

Мадумаров 26-октябрда эртең менен УКМКнын тергөө абагынан Бишкектеги Мирсаид Миррахимов атындагы улуттук кардиология жана терапия борборуна жеткирилип, кийин кайра абакка которулган.