Орхан Инандынын Түркиянын атайын кызматтары тарабынан кармалышы боюнча анын үй-бүлөсүнүн жактоочусу Таалайкүл Токтакунова социалдык тармактагы баракчасына билдирүү жазды.
Жактоочу мыйзамдын негизинде Кыргызстандын жаранын кайтарып келүүнү талап кылды.
«Орхан Инандынын жубайы бүгүн дагы жалгыз, үн-сөзү жок митингге чыкканы жаткан. Бирок Рейхан Инанды жолдошун Түркиянын атайын кызматы Кыргызстандан алып кеткенин билип, анын өңүнөн азып, бир колу шишиген сүрөтүн көргөндөн кийин дароо өзүн жаман сезе баштаган», — деп жазган ал.
«Сапат» билим берүү мекемелеринин башчысы Орхан Инанды Түркияга алынып келгенин түрк президенти Pежеп Тайып Эрдоган 5-июлда элге кайрылып жатып билдирген.
Эске салсак, Кыргызстандын жарандыгын алган Орхан Инанды 1-июндун түнүнөн бери дайынсыз болуп жаткан. Анын автоунаасы Октябрь районундагы Малдыбаев көчөсүндө Ала-Арча суусунун жээгинде эшиги ачык калган абалда табылган. Аны издөөнү президент Садыр Жапаров күч органдарына тапшырган.