Бишкек шаарында алдамчылыкка шектелген аял киши кармалды. Бул тууралуу бүгүн, 8-майда ШИИБдин басма сөз кызматы билдирди.
Түзүмдүн маалыматы боюнча, укук коргоо органдарына жергиликтүү жашоочу арыз менен кайрылган. Анын айтымында, өзүн Назира деп тааныштырган аял 2019-жылы декабрь айында чет өлкөдөн унаа айдап келип берүүнү убадалаган. Ал арыз ээсинен 5000 доллар алгандан кийин качып кеткен.
«Бул факт Кылмыштар жана жоруктардын бирдиктүү реестрине Жазык кодексиндеги 204-берене (алдамчылык) боюнча катталган. Шектүү — 1976-жылы туулган Ж.М. 6-майда милиция кызматкерлери тарабынан кармалып, убактылуу кармоочу жайга киргизилди. Учурда анын ушул сыяктуу башка кылмыштарга тиешеси текшерилип жатат», — деп айтылат маалыматта.
