Жогорку сот 2010-жылдагы июнь окуялары боюнча өмүрүнүн аягына чейин эркинен ажыратылган укук коргоочу Азимжан Аскаровдун өкүмүн күчүндө калтырды. Бул тууралуу 24.kg агенттигине анын жактоочусу билдирген.
Маалыматка ылайык, мындай чечимди Жогорку сот 13-майда чыгарып, Аскаровдун жактоочуларынын арызын четке каккан.
Белгилей кетсек, Аскаровдун кыргыз өкмөтүнө карата Бишкектин район аралык сотуна жазган дагы бир доо арызын кароо 11-майга белгиленип, бирок каралбай калган.
69 жаштагы укук коргоочу 2010-жылы июнь окуяларында массалык башаламандык уюштурууга жана киши өлтүрүүгө катышкан деп айыпталып, өмүрүнүн аягына чейин эркинен ажыратылган.