Коомдук саламаттык сактоо башкармалыгынын жетекчиси Айнура Акматова коомчулукта тарап жаткан медкызматкерлерге байланыштуу түрдүү видеолорго түшүндүрмө берип жатып, ыйлап жиберди.
“Ак халатчандар бүгүнкү күндө күнү-түнү тынымсыз иштеп жатат. Техника деген техника да, ал жолдо токтоп, бузулуп калат экен. Анан дарыгерлер бейтапты аман сактап калуу үчүн болгон күчүн жумшап жатышат”, — деди Акматова.
Көзүнө жаш алган Айнура Акматова кечирим сурап, брифингди улантты.
Буга чейин медицина кызматкерлери бузулуп калган тез жардам унаасын түртүп бараткан видео социалдык түйүндөргө тараган эле.