Бишкек.30.05.2019.Govori.TV.
Башкы прокуратура мурунку президент Алмазбек Атамбаевдин иш бөлмөсүнө сүйлөшүүлөрдү угуучу жабдык орнотуу аракети болгону тууралуу маалымат боюнча сотко чейинки өндүрүш ишин баштады.
Башкы прокуратуранын басма сөз кызматы бүгүн, 30-майда тараткан маалыматта: «Аталган макалаларда УКМКнын өкүлү делген адам КСДПнын кызматкерин экс-президент А.Атамбаев жана КСДПнын төрагасынын орун басары Ф.Ниязовдун иш бөлмөсүнө үн тыңшоочу каражат орнотууга тартканы белгиленген. Видеодо электр узарткычка үн тыңшагыч орнотулганы көрсөтүлгөн», — деп айтылат.
Кылмыштар жана жоруктардын бирдиктүү реестри боюнча жобонун талаптарына ылайык, жасалган же даярдалып жаткан кылмыш же жорук тууралуу бардык маалымат сотко чейинки өндүрүшкө себеп болот. Жазык кодексиндеги 151-берене боюнча, ыйгарым укуктуу органдар жасалган кылмыш же жорук тууралуу маалыматты кабыл алып жана каттоого милдеттүү.
24-майда Аскер прокуратурасы тарабынан топтолгон материалдар Жазык кодексинин 186-беренесинин 1-бөлүмү (жекече жашоонун кол тийбестигин бузуу), 189-берененин 2-бөлүмү (кат алышуу жашыруундуулугун бузуу) жана 320-берененин 2-бөлүмү (кызмат абалынан кыянаттык менен пайдалануу) боюнча Кылмыштар жана жоруктардын бирдиктүү реестрине катталып, сотко чейинки өндүрүшкө алынды.
«А.Атамбаевдин расмий арызы Башкы прокуратурага 27-майда түшкөн. Буга байланыштуу аталган арыз буга чейин башталган сотко чейинки өндүрүшкө кошулду. Анын жүйөлөрү тыкыр иликтенип, тиешелүү тергөө иш-чаралары жүргүзүлүп, анын жыйынтыгы менен юридикалык баа берилет», — деп айтылат маалыматта.
