Баткен облусуна караштуу Кызыл-Кыя шаарында киши өлтүргөнгө шектелген жаран кармалды. Бул тууралуу облустук милициядан билдиришти.
Маалыматка ылайык, 12-июнь күнү саат эртең менен 07:00 чамасында шаардагы Пионер көчөсүндө эркек адамдын жансыз денеси жаткандыгы боюнча милицияга маалымат түшкөн.
Окуя болгон жерге барган ыкчам-тергөө топ, маркумдун денесинде жарааттардын бар экенин аныкташкан.
Бул факты Жазык кодексинин 130-беренеси (“Киши өлтүрүү”) менен сотко чейинки өндүрүшкө алынып, тергөө башталган. Анда кылмышка шектүү катары өткөн жылдын сентябрь айынан бери издөөдө жүргөн Кызыл-Кыя шаарынын 46 жаштагы тургуну из жашыруу максатында Бишкек шаарына кетип бара жаткан жеринен Кызыл-Кыя шаарындагы автобекеттен кармалган.
Учурда тиешелүү экспертизалар дайындалып, шектүү убактылуу кармоочу жайга киргизилген.