Бишкек шаарында жүргүнчүлөрдөн жол акысына 20 сомдон алган №212 кичи автобустун айдоочусуна 8 миң 500 сом айып салынды. Бул тууралуу шаардык транспорт башкармалыгынын маалыматына таянып, АКИpress агенттиги жазды.
Маалыматка караганда, кичи автобустун айдоочусу И.О. саат 23:00дөн кийин жүргүнчүлөрдү ташып, жол акысына 20 сомдон алган.
«Айдоочуга карата 2 протокол түзүлүп, 8,5 миң сом айып пул салынды», — деп айтылат маалыматта.
Ошол эле учурда айдоочу көрсөтүлгөн убакытта иштеген эместигин айткан. Анын айтымында, Сокулуктан Бишкекке келе жатып кичи автобуска жолдогу адамдарды салып алган.