Бишкектин вице-мэри Жамалбек Ырсалиев жол кырсыгына кабылды. Маалыматты Govori.TVга Жалал-Абад облустук Жол кыймылынын коопсуздугун камсыздоо башкармалыгынын басма сөз кызматы тастыктады.
Маалыматка ылайык, 26-июлда болжол менен эртең мененки саат 06:00 чамасында Бишкек – Ош унаа жолунун 217-чакырымында Toyota Alphard унаасынын айдоочусу уктап кетип, бетон тосмону сүзүп алган.
«Унаада жүргүнчү катары Бишкектин вице-мэри Жамалбек Ырсалиев болгон, ал жана дагы эки жүргүнчү райондук ооруканага жаткырылган. Дагы бир жүргүнчү К.Т. жандандыруу бөлүмүнө түшкөн. Айдоочу М.А. жабыркаган эмес»,-деп билдиришти Жалал-Абад облустук Жол кыймылынын коопсуздугун камсыздоо башкармалыгынын басма сөз кызматынан.
Аталган факт кылмыштардын жана жоруктардын бирдиктүү реестрине катталып, текшерүү жүрүп жатат.