Бүгүн, 5-октябрда, шайлоонун жыйынтыгын кол менен саноо журуп жатат. Алдын ала маалыматтар боюнча БШК 12:00гө карата бюллетендердин 23% саналып бүткөн.
Ага ылайык биринчи орунда «Мекеним Кыргызстан» (23,29%), экинчи сапта «Биримдик» (19,27%), үчүнчүдө «Кыргызстан» (8,29%), төртүнчү орунда «Республика» (7,56%) жана бешинчи болуп «Мекенчил» (7,38%) партиялары келе жатат. Ал эми «Бүтүн Кыргызстан» жана башка партиялар кол менен саноонун жыйынтыгы менен 7% босого чектен өтө элек.
Эске салсак, 4-октябрда Кыргызстанда кезектеги парламенттик шайлоо өттү. Ага катышкан 16 партиянын арасынан төртөө болжолдуу түрдө жети пайыздык босогодон өттү. «Биримдик» партиясы эң көп (24,5%) добушка ээ болду. Андан кийин «Мекеним Кыргызстан» 23,9%, «Кыргызстан» 8,7%, «Бүтүн Кыргызстан» 7,0% алды.
