Эрдоган БУУда сүйлөп жатканда микрофон өчүп калды. ЖМКлар муну саботаж деп аташты

Түркиянын президентинин Палестинага арналган БУУнун Башкы ассамблеясынын атайын сессиясындагы сөзү күтүүсүздөн үзгүлтүккө учурады. Акыркы 1 мүнөт 40 секунду угулбай калды, бул Түркиянын маалымат каражаттарында жана социалдык тармактарда «Микрофон атайылап өчүрүлдүбү?» деген талкууну жаратты, деп билдирет «Түркиянын күн тартиби» Telegram-каналы.

Түркиянын президентинин алдындагы коммуникация башкармалыгы кийинчерээк расмий комментарий берди.

Алардын билдирүүсүнө ылайык, конференциядагы бардык мамлекет башчыларына 5 мүнөттөн убакыт берилген жана Эрдогандын сөзү да өзгөчө болгон эмес. Микрофон убакыт бүткөндөн кийин автоматтык түрдө өчүп калган.

«Президент сөзүн андан көп өтпөй аяктады», — деп айтылат билдирүүдө.

Ошол эле себептен Индонезиянын президентинин микрофону да өчүрүлгөнү белгиленет.

Ал арада кечээ кечинде түрк маалымат каражаттары мунун Израил тарабынан жасалган диверсия болушу мүмкүн экенин талкуулашты.

Бирок баары алда канча жөнөкөй болуп чыкты.

Түрк лидеринин кайырылуусунда, Газа ХАМАС кыймылына каршы күрөшүү шылтоосу менен жок кылынып жатат, бирок ХАМАС башкарбаган Батыш жээкте да оккупация кеңейүүдө. Ал Махмуд Аббастын БУУдагы иш-чараларга катышпаганына нааразычылыгын билдирип, бардык өлкөлөрдү Палестинаны таанууга чакырды.

«Израилдин жетекчилиги азыр толугу менен көзөмөлдөн чыгып кетти, Израилдин Катарга кол салуусу Биньямин Нетаньяхунун өкмөтү чындыктан таптакыр алыстап кеткенин көрсөтүп турат. Газа секторундагыдай кан төгүүнү дүйнөдө эч ким көргөн эмес. Бул геноцид», — деди Режеп Тайып Эрдоган.

Анын айтымында, Израил Газада атайылап 250 журналистти өлтүрдү, ал эми БУУ сектордогу өз кызматкерлерин да коргой алган жок.

«Израилдин күчөп бараткан агрессиясынан улам Экинчи дүйнөлүк согуштан кийин калыптанган баалуулуктар бузулууда», — деп кошумчалады Түркиянын президенти.