Каракол шаарында үйлөнүү үлпөт кортежинин айдоочулары бейбаштыгы үчүн кармалып, айыппул салынды. Бул тууралуу облустук милициянын басма сөз катчысы Сталбек Усубакунов билдирди.
Маалыматка ылайык, 26-августта социалдык тармактарда үйлөнүү үлпөт кортежинин айдоочулары ышкырып-кыйкырып, Каракол шаарынын көчөлөрүндө жол кыймылынын эрежелерин бузган видео пайда болгон. Натыйжада жол эрежесин одоно бузган айдоочулар кармалган.
«Хонда-Фит «унаасынын айдоочусу, Каракол шаарынын 20 жаштагы тургуну К.А. жана «ДЭУ-Некция «унаасынын айдоочусу 20 жаштагы С.А. кармалып, алардын ар бирине 7500 сомдон айып пул салынды. Унаалар Каракол шаарындагы унаа токтотуучу жайга киргизилди»,-деп айтылат маалыматта.