Алмазбек Атамбаевдин мурунку тарапташы Алга Кылычев кийинки жылдын 9-февралына чейин үй камагында калтырылды. Бул тууралуу КСДПнын расмий өкүлү Кундуз Жолдубаева билдирди.
Анын айтымында, мындай чечимди Биринчи май райондук соту кабыл алды.
Токтомго ылайык, ал саат 22:00дөн 06:00гө чейин үйүндө болушу шарт.
Ошондой эле депутаттар Асел Кодуранова менен Ирина Карамушкинанын үй камактагы мөөнөтү дагы узартылды.
Ирина Карамушкина 7-августта Алмазбек Атамбаевдин үйүндө кишилерди барымтага алганга катыштыгы бар делип шектелүүдө. Соттун чечими менен ал үй камагына чыгарылган.
Эске салсак, УКМКнын атайын кызматы 7-августта Алмазбек Атамбаевдин Кой-Таштагы үйүн басып алууга аракет кылган. Бирок, операция ийгиликсиз болгон. Башаламандык маалында 45 киши жаракат алган. «Альфанын» кызматкери октон каза тапкан.
8-августта атайын операцияны ИИМдин атайын бөлүмчөсү колго алган, жыйынтыгында мурунку президент багынып берди. Ал УКМКнын тергөө абагына 26-октябрга чейин камакка алынды. Алмазбек Атамбаевге укук коргоо органдарына карата зомбулук көрсөтүү, адам өлтүрүү, барымтага алуу, массалык башаламандык уюштуруу, жемкорлук айыбы тагылууда.
