Кыргызстандагы бардык мугалимдер педагогикалык билимине карабай, 30%га жогорулаган айлык акы ала баштады. Бул тууралуу бүгүн, 31-октябрда Кыргыз Республикасынын билим берүү жана илим министри Каныбек Исаков маалымат жыйында билдирди.
Анын айтымында, быйыл билим берүү тармагында иштеген кызматкерлердин айлык акысынын көтөрүү үчүн 6 млрд 900 млн сомдон ашык каражат бөлүнгөн.
Бүгүнкү күндө мектептерде, бала бакчаларда жалпы билим берүү мекемелериндеги мугалимдер көтөрүлгөн айлык маянаны ала баштады. Жалал-Абаддын Токтогул районунда 18 саат менен иштеген 7 жылдык тажрыйбасы бар мугалим 13 миң 8 сом алса, октябрда 18 миң 355 сом алат,-деди министр Исаков.
Эске салсак, 30-сентябрда премьер-министр Мухаммедкалый Абылгазиев Кыргызстанда мугалимдердин эмгек акысын 1-октябрдан тарта отуз пайызга көбөйтүү боюнча токтомго кол койгон.
