Камактагы мурунку премьер-министр Сапар Исаков жаза өтөп жаткан абактан убактылуу гана боштондукка чыккан. Бул тууралуу ал өзү Координациялык кеңештин жыйынында билдирди.
Анын айтымында ал мыйзам чегинде 7 күнгө бошотулганын айткан.
«Сот болгонго чейин абактын жетекчилигинин укугу бар экен 7 күнгө үйгө чыгарганга. Бул аралыкта сот башталышы керек, күбөлөр суралуусу керек», — дейт ал.
Эске салсак, 5-октябрда парламенттик шайлоонун жыйынтыгына нааразы болгон партиялар баштаган тынчтык митинги массалык башаламандыкка айланып, 6-октябрда митингчилер парламент менен президент отурган имаратты басып алышкан.
Андан кийин митингчилер абакта жаткан айрым саясатчыларды бошотушкан. Алардын арасында мурдагы премьер-министр Сапар Исаков бар. Ал Бишкек шаарындагы ЖЭБди модернизациялоо боюнча козголгон кылмыш иши боюнча күнөлүү деп табылып, 18 жылга эркинен ажыратылган. Апрель айында ал Молдовановка айылындагы №27 жазаөтөө мекемесине которулган.
