Судандын чыгышында жаан-чачындан улам дамба жарылып, кеминде 30дан ашык адам көз жумган.
Андан тышкары элге электр жарыгын жеткирүүчү жабдыктар иштен чыгып, алтын шахтаны да суу каптады.
Суу сактагычтагы дамба Порт-Судан шаарынын жашоочулары үчүн суунун негизги булагы болгон. 2023-жылдагы эсеп боюнча шаарда 489 миңдей адам жашайт.
Судандын Саламаттыкты сактоо министрлигинин маалыматы боюнча, өлкөдөгү жаан-чачындын кесепетинен жалпы 132 адамдын өмүрү кыйылды. Дагы 200 дөй адамдын дайыны табылбай жатат.
Жаан-чачындын суусу өлкөдөгү 10 провинцияны каптап, алардын ичинен Түндүк жана Нил провинциялары көбүрөөк жабыркады.
БУУнун маалыматы боюнча, 50 миңден ашык адамдын турак жайы жараксыз болуп калган.