Ысык-Көлдө жергиликтүү тургундун үйүнөн ири өлчөмдөгү баңгизаты табылды. Бул тууралуу облустук милициянын басма сөз кызматы билдирет.
Маалыматка ылайык, ИИМдин Ысык-Көл жана Нарын облустары боюнча баӊгизаттарды мыйзамсыз жүгүртүүгө каршы күрөшүү башкармалыгынын ыкчам кызматкерлери Жети-Өгүз райондук милиция кызматкерлери менен биргеликте жергиликтүү тургундан 10 кг баңгизатын табышкан.
«Январь айынын аягында Жети-Өгүз районунда «Кепа» аттуу адам үйүндө өзгөчө ири өлчөмдө мыйзамсыз баӊгизатын сактап жүрөт деген маалымат түшкөн. Жергиликтүү тургундун өздүгү такталган, ал Дархан айылынын 46 жаштагы Д.К., аттуу жашоочусу болуп чыккан», — деп айтылат маалыматта.
Шектүү адамдын үйүн тинтүү учурунда сарайынан жана жер төлөөсүнөн 8 данаа 5 литрлик желим идишке жана атайын баштыкка салынган жапайы кендир жыттанган өсүмдүк заты табылган.
Экспертиза көрсөткөндөй шектүүнүн үйүнөн 10 килограмм 385 грамм марихуана жана 3 грамм гашиш алынган.
Аталган факт Жети-Өгүз райондук ички иштер башкармалыгынын Кылмыштар жана жоруктардын бирдиктүү реестрине катталып, Кылмыш-жазык кодексинин 268-беренесинин 2-бөлүгү менен сотко чейинки өндүрүш иши башталган.
