Ысык-Көл облусунун бир тургунунан коронавирус аныкталды. Turmush басылмасы Саламаттыкты сактоо министрлигинин Ысык-Көл облусундагы координатору Мирбек Сагынбаевге таянып билдиргендей, коронавирус аныкталган жаран Жети-Өгүз районунун 1997-жылы туулган жашоочусу.
Ал 25-май күндөрү Бишкек шаарында туугандарынын үйүндө конокто болгон. Кийин Ысык-Көл облусуна келип, жентек той өткөргөн. Тойго 20 киши барган.
«Бүгүнкү күндө тойго баргандардын баарынан анализдер алынды. Алар үй карантинде болушат» — деп билдирген облустун координатору.
Белгилей кетсек, буга чейин аталган облуста 14 кишиден коронавирус аныкталып, алардын баары айыгып ооруканадан чыкканы айтылган эле.