Юрист: “Чет элдик өкүл” мыйзам долбоорун кароодо регламент бузулду

Бугүн, 20-февралда Конституциялык мыйзамдар, мамлекеттик түзүлүш, сот укук маселелер боюнча комитетинде “Коммерциялык эмес уюмдар жөнүндө” мыйзам долбоорун кароодо регламент бузулду. Бул тууралуу Govori.TVга юрист Таттуубүбү Эргешбаева билдирди.

Анын айтымында, 2024-жылдын 14-февралында Жогорку Кеңештин депутаттары «Коммерциялык эмес уюмдар жөнүндө» мыйзам долбоорунан кылмыш-жаза жоопкерчилигин алып салуу зарылдыгын белгилеп, аны кайра иштеп чыгуу үчүн Конституциялык мыйзамдар, мамлекеттик түзүлүш, сот укук маселелер боюнча тиешелүү комитетке кайтарып берүү үчүн добуш беришкен.

«Деген менен бүгүн аталган комитет күн тартибине «Чет элдик өкүл» мыйзамын кезексиз киргизип, экинчи окууда жактырды. Регламенттин 55-беренесине ылайык, мыйзам долбоору парламенттин атайын чечимине муктаж болбостон, экинчи окууда жаңы өзгөртүүлөр келип түшсө, комитетке кайра кароого кайтарылышы мүмкүн. Бирок жаңы түзөтүүлөрдү ачык кароосуз мыйзам долбоорун тез арада кароо процессуалдык эрежелердин сакталышы боюнча суроолорду жаратат. Ошондой эле Регламенттин 53-беренесине ылайык, мыйзам долбоорун окуунун ортосунда 10 жумушчу күндөн кем эмес аралык болушу керек, бул аны кылдат талдоо жана талкуулоо үчүн убакытты камсыз кылат. Бул иш-аракеттер Жогорку Кеңеште айкындуулукту, отчеттуулукту жана кабыл алынган мыйзамдардын сапатын камсыз кылуунун негизги бөлүгү болгон жөнгө салуучу жол-жоболорду так сактоодо суроолорду жаратат»,-деди ал.

Кошумчалай кетсек, Жогорку Кеңештин Конституциялык мыйзамдар, мамлекеттик түзүлүш, сот укук маселелер боюнча комитетинде “Коммерциялык эмес уюмдар жөнүндө” жана Кылмыш-жаза кодексине өзгөртүүлөрдү киргизүү жөнүндө” мыйзам долбоору 20-февралда каралып, анда кылмыш жоопкерчилигине тартуу беренеси алынды.

«Чет элдик өкүл» мыйзамы комитетте күтүүсүз каралып, кылмыш жоопкерчилиги алынды

Бейөкмөт уюмдарга көзөмөлдү күчөтөт деп сынга кабылган «чет өлкөлүк өкүл» тууралуу мыйзам долбоорун ЖК депутаты Надира Нарматова жазып, былтыр ноябрда коомдук талкууга чыгарган. Башында өзү жалгыз автор болуп көрсөтүлгөн документке дагы 32 депутат демилгечи болуп кошулган. Бирок кийин алардын айрымдары авторлуктан кайра баш тартып жатышат.

“Адилет” укуктук клиникасы бул “чет өлкөлүк өкүл” мыйзамын талдап чыгып, анын 98% Орусиянын “чет элдик агенттер” тууралуу мыйзамынан көчүрүлүп алынганын аныктаган.

Ал эми депутат Надира Нарматова мыйзам долбоору сөз эркиндигин, бейөкмөт же эл аралык уюмдардын ишин чектебей турганын айтып келет.