Бишкекте жөө адамды сүзүп, окуя болгон жерден из жашырып кеткен айдоочу кармалды. Бул тууралуу Милициянын кайгуул кызматынан билдиришти.
Маалыматка ылайык, кырсык 22-ноябрда болжол менен саат 22:10 чамасында орун алган. Бишкек ШИИББинин нөөмөт кызматына Термичиков көчөсүндө жөө жүргүнчүнү сүзүп кетишти деген маалымат келип түшкөн.
«Кайгуул кызматкерлери жерине барып, болжол менен 50-55 жаш курактагы кебетеси азиалык болгон жаранды унаа сүзүп, айдоочу окуя болгон жерден качып кеткендигин аныкташкан. Кырсыктын кесепетинен жөө адам жеринен каза болгон. Ыкчам издөө иш-чараларынын жүрүшүндө кылмыш изи сууй электе шектүү катары Деу Нексия үлгүсүндөгү унаанын айдоочусу, 1989-жылы туулган О.Э. жана Д.М. аттуу жүргүнчүсү кармалды»,-деп айтылат маалыматта.
Бул факты Кылмыштардын жана жоруктардын бирдиктүү реестрине катталып, тергөө иштери жүрүүдө.
