Жаңы жылдан кийин 1-класстын окуучуларын түз эле экинчи класска өткөрсө болот. Бул тууралуу билим берүү жана илим министри Догдуркүл Кендирбаева бүгүн маалымат жыйында билдирди.
Анын айтымында, 12 жылдык билим берүүгө өтүү этап менен жүрөт.
«Балдарга ашыкча жүк болбошу үчүн бул системаны акырындык менен киргизебиз. Окуу жылы башталгандан кийинки алгачкы эки айдын ичинде балдардын билиминин сапатын салыштырмалуу талдоо жүрөт. Эгерде алар экинчи класстын программасына ылайык келсе, бардык класс кийинки баскычка которулушу мүмкүн»,-деди министр.
