Казакстан Орусияны айланып өтүп, Баку-Тбилиси-Жейхан кууру аркылуу мунай ташууну жылына 1,5 миллион тоннадан 2,2 миллион тоннага чейин көбөйтүүнү макулдашты. Келечекте анын көлөмү 3 миллион тоннага чейин жогорулашы керек.
Макулдашууга 11-мартта Казакстан президенти Касым-Жомарт Токаевдин Азербайжанга болгон сапары учурунда кол коюлду.
«Бул макулдашуунун алкагында тараптар Актау-Баку-Тбилиси-Жейхан маршруту боюнча мунай ташуу тарифтерин төмөндөтүү, ошондой эле Баку-Супса багыты боюнча казак мунайзаттарын ташуу маселелерин талкуулоону улантат», — деп айтылат «КазМунайГаз» компаниясынын билдирүүсүндө.
