Бишкек ШИИБдин жана Аламүдүн РИИБдин кызматкерлери мурдагы президент Алмазбек Атамбаевдин жээни Акылбек Асаналиевдин үйүн тинтүүгө алды. Бул тууралуу Асанлиев өзү Vesti.kg сайтына билдирген.
Анын айтымында, бүгүн, 4-мартта болжол менен саат 8:30дар чамасында Арашан айылындагы үйүнө 5 милиция кызматкерлери келип, тинтүү жүргүзгөн.
«Милиция кызматкерлери үйдүн баарын тинтип чыгышты. Бирок алар бизге эмне издеп жаткандарын түшүндүрүшкөн жок»,-деп билдирген Асаналиев.
Ал эми тергөөчүлөрдүн айтканына караганда, тинтүү иштери 2019-жылдын декабрь айында Беш-Күңгөй айылындагы май куйуучу бекеттин жанында болгон кол салуу боюнча козголгон кылмыш ишине байланыштуу болгон.
Атамбаевдин туугандары тинтүү иштери 2019-жылдын август айындагы Кой-Таш окуясына байланыштуу болушу мүмкүн деп эсептейт.
Кошумчалай кетсек, Акылбек Асаналиев мурдагы президент Алмазбек Атамбаевдин бир тууганынын баласы.