Коомчулукка финансы тармагы боюнча кеңешчи катары белгилүү болгон жана бир катар жетекчилик кызматтарда иштеген Айдар Мокенов 27-июлда узакка созулган оорудан кайтыш болду.
Жакындары маркумдун сөөгү 28-июлда жерге берилерин билдиришти. Маалыматка караганда, 57 жаштагы Мокенов көптөн бери ооруп жүргөн.
Мокенов Айдар Абдразакович 1963-жылы туулган. 1999-2001-жылы «Кыргызалтын» акционердик коомунун вице-президенти болгон.
2005-жылы өкмөткө караштуу Маалымат ресурстары жана технологиялар агенттигин, 2012-2013-жылдарда «Кыргызпочтасы» мамлекеттик ишканасын жетектеген.
2008-2009-жылдары Экономикалык өнүгүү министринин орун басары кызматын аркалаган. Эмгек тажрыйбасында мындан башка бир топ кызматтарда иштеп, бир катар мекемелерде финансылык-экономикалык кеңешчи болуп эмгектенген.
Айдар Мокеновдун артында жубайы, төрт баласы калды.
