Казак бийлиги Арон Атабектин өлүмүнө өзүн күнөөлүү деп эсептебейт

Казакстандын Ички иштер министрлигине (ИИМ) караштуу Кылмыш-аткаруу системасынын комитет төрагасынын орун басары Мейрам Аюбаев акын Арон Атабектин өлүмүнө бийликти айыптаган активисттер менен укук коргоочулардын билдирүүлөрүнө жооп берди.

2007-жылы «Шанырак иши» боюнча 18 жылга соттолгон диссидент-акын быйыл 1-октябрда ден соолугуна байланыштуу эркиндикке чыгып, 24-ноябрда ооруканада каза болгон.

Атабек «Азаттыктын» каза кызматына берген маегинде абакта кыйноого алынганын, өтө начар шарттарда кармалганын жана эркиндикке «өлүшү үчүн гана» чыгарышканын айткан. Акын «шанырак окуясы» боюнча күнөөсү жок экенин айтып, өзүн мыйзамсыз соттолгон адам катары эсептеп келген.

«Арон Атабектин өлүмү үчүн Кылмыш-аткаруу системасы күнөлүү деп эсептебейм. Ал 2019-жылдан бери бардык медициналык текшерүүлөрдөн баш тарткан. Акыркы кездери ал арыктай баштаганы байкалган. Жыл башында сырттан Улуттук превентивдик механизмдин, Коомдук көзөмөл комиссиясынын өкүлдөрүн жана дарыгерлерди чакырганбыз. Алар ага дарыгерлерге көрүнүүнүн маанилүүлүгүн түшүндүрүп, бул боюнча жакындарына да маалымат берилген. Дарыгерге кайрылуу же кайрылбоо — бул ар бир адамдын конституциялык укугу. Акыры ал дарыгерге көрүнүүгө макул болуп, 22-сентябрда Павлодар ооруканасына жаткырылган. Ал жактан ага бир нече диагноз коюлган. Кайсылар экенин так айта албайм, ал дарыгерлердин сыры болгон. 1-октябрда Павлодар соту аны эркиндикке чыгаруу чечимин кабыл алган», — деди Аюбаев «Азаттыктын» казак кызматынын суроосуна жооп берип жатып.

Атабектин тарапташтары акын бийликтин сындаганы жана аларга ылайыксыз коомдук ишмердүүлүк менен алетенгени үчүн камакка алынганын айтып келишкен. Бийлик бул версияны четке кагып, эч кандай саясий куугунтук жок экенин билдирген.

Атабектин өлүмүнөн кийин эл аралык укук коргоо уюмдары менен жергиликтүү активисттер бийликтен түшүндүрмө талап кылып, акындын өлүмү боюнча эл аралык иликтөө жүргүзүү зарылдыгын айтышкан.