Самара — Оренбург унаа жолунда кыргызстандык жети жараны кырсыкка кабылды. Бул тууралуу жергиликтүү ЖМКлар жазды.
Маалыматка ылайык, окуя 14-январь күнү эртең менен М-5 «Урал» трассасынын 181-чакырымында болгон. Анда үч унаа — эки Mercedes-Benz Sprinter менен Honda Stepwgn кагышкан.
“Окуянын кесепетинен сегиз киши — жүк ташуучу унаанын айдоочусу менен Honda Stepwgn автосундагы жети кыргызстандык жабыркаган. Алардын үчөө Бузулук районундагы оорукананын реанимациясына, бешөө хирургия бөлүмүнө жаткырылган”,-деп айтылат маалыматта.
Учурда териштирүү иштери башталган.