Равшан Жээнбеков кырдаалдан чыгуу боюнча бийликке сунуш киргизди

Бишкектеги №1 тергөө абагында отурган саясатчы Равшан Жээнбеков кыргыз коомчулугуна жана президент Сооронбай Жээнбековго экономиканы стабилдештирүү жана өнүктүрүү боюнча сунуш жолдоду.

Жээнбековдун кайрылуусунда мамлекеттин алдында экономиканы, бизнести жана социалдык абалды стабилдештирүүгө каражатты табуу маселеси жазылган. Саясатчы каражат табуу үчүн бийлик жана коом кандай кадамдарга барышы керектигин белгилеген.

Алар төмөнкү кадамдар:

• Жаңы өкмөт куроо. Өкмөттүн курамынын жок дегенде 50% Япониядан, Сингапурдан, Түштүк Кореядан, Германиядан, Англиядан жана АКШдан билим жана тажрыйба алган адистер болушу зарыл. Өкмөт башчы мүнөзү күчтүү, дүйнөдөгү көрүнүктүү окуу жайдын биринен билим алган адам болушу маанилүү.

• Ал өкмөт УКМКнын, ИИМдин, Прокуратуранын жана сот системасынын радикалдуу реформасын жасашы принципиалдуу маанилүү. Мисалы, УКМКдан коррупция менен күрөшүү, тергөө жана саясий репрессия функцияларын алуу абзел. Булар өкмөттүн карамагына өтөт. Укук коргоо органдары сот системасы 30 эгемендүүлүк жылдарыбызда экономикалык өнүгүүнүн тормозу болуп калганын баарыбыз билебиз.

• Өкмөт мамлекеттик кызмат көргөзүүнү минималдаштыруу, жөнөкөйлөштүрүү жана экономикалык кылмыштар жазасын гумандаштырууга барышы керек.

• Өкмөт калктын аярлуу катмарына, студенттерге, пенсионерлерге жана орто жана чакан бизнеске каржылык колдоо көрсөтөт. Мисалы, азыркыдай ун, чай, май эмес, минималдуу айлык акы деңгээлиндеги акчалай пособие. Эл аралык финансы институттары ишенген өкмөттүк командага керектүү каражатты табуу бир топ жеңил болот.

• Өкмөт сөз эркиндигин, чогулуш эркиндигин, саясий атаандаштыкты сөз жүзүндө эмес, күйүп-бышып колдоого милдеттүү болот. Себеби, бул баалуулуктар экономиканын өнүгүшүнө, жаңы жумуш орундарын түзүүгө, коррупция менен күрөшүүгө, адилеттүү коом курууга кызмат кылат.

«Мен азыркы өкмөткө дагы программаны сунуш кылат элем. Бирок, сунуш кылбадым. Себеби, азыркы өкмөткө жеткиликтүү каражатты эч ким бербейт. Ишеним жок. Жаңы өкмөт курулуп, бирок курамы, тутунган баалуулуктары жана принциптери азыркыдай болсо, аларга дагы ишеним болбойт. Каражат таба албайт. Ошондуктан, мен толугу менен ишенем, эгер экономиканы стабилдештирип гана тим болбой, өнүгүүгө багыт алабыз, адилеттүү жана татыктуу өлкө курабыз десек, анда саясий элита, коом мен айткан сунуштарды колдошу, талап кылышы зарыл»,-деп жазган ал.

Саясатчы Равшан Жээнбеков Кой-Таш окуясы боюнча айыпталып, камакка алынган. 3-мартта Кой-Таш окуясы боюнча алгачкы сот отуруму жабык болду. Бул ишке байланыштуу мурдагы президент Алмазбек Атамбаев баштаган 19 адамга айып коюлган. Алардын 14ү соттун ачык өтүшүн талап кылышууда.

2019-жылы 7-8-августта Улуттук коопсуздук боюнча мамлекеттик комитет (УКМК) жана Ички иштер министрлиги (ИИМ) Чүйдүн Кой-Таш айылында мурдагы президент Алмазбек Атамбаевди кармоо операциясын жүргүзгөн. Анда бир офицер курман болуп, 200дөн ашык адам жабыркаган.