Шектүүнүн атып өлтүрүлгөндүгүн сынга алган Феликс Кулов оюн өзгөттү

Кыргызстандын экс-премьер-министри Феликс Кулов буга чейин соцтармак баракчасына «Ак-Ордо» конушундагы эки кишини өлтүрүүгө шектелип жаткан адамдын жок кылынышы боюнча комментарий берип, атайы кызматкерлердин ишин сынга алган болчу.

Көп өтпөй ал аталган билдирүүсүн соцтармактан өчүрүп салган.

Күн өткөн соң ал кайрадан соцтармакка пост жазып, «шектүүнүн качуу аракети учурунда өлүмгө дуушар болгон күч колдонууга байланыштуу жаңы жагдайлар мени мурунку корутундуларымды кайра карап чыгууга мажбур кылды», — деп жазды.

«Буга чейин мен кылмышка шектүүнү коштоп жүргөн кызматкерлер мыйзам чегинде иш алып барып, эскертүүдөн кийин куралын мыйзамдуу колдонушканы менен, кызматтык шалаакылыктын белгилерин жасашкан деген пикирди айткам. Ошондо менин ырастоом тергөө иш-чаралары күндүз жана ачык жерде жүрүп, шектүүнү кармоо оңой көрүнгөн маалыматка негизделген», — дейт ал.

Бирок, ал бир нече офицерлер менен сүйлөшкөндөн кийин окуялар башкача өнүккөнү белгилүү болгонун айтат.

«Керектүү тергөө иш-чаралары аяктагандан кийин шектүү Ысык-Көл облусунан Бишкекке түн ичинде алынып келе жаткан. Алар Боом капчыгайынан чыгып баратышканда, ал ажатканага суранган. Аны менен кошо бир жуп менен кишенделген офицер өз колунан кишенди алып, шектүүнүн эки колуна кийгизген. Шектүү болжол менен беш метр аралыкты басып өтүп, күтүүсүздөн качкан. Түнкү саат 3төр чамасында болгон. Оперативдүү кызматкерлер жана атайын багыттагы жоокер анын артынан чуркап, кайра-кайра токтотууну талап кылып, курал колдонуу ниетин эскертишкен. Качкын жооп бербей, качып кете берген. Андан соң спецназдын жоокери эскертүү иретинде асманга ок чыгарган. Мылтыкты тартканда автоматтан үч ок чыккан. Шектүү токтобостон, ылдамдаган. Кырдаал түн болуп, качкын оңой эле качып кетчү тоолуу аймакта болгондуктан татаалдашкан. Мындай шартта спецназдын жоокери бирден-бир туура чечимди — шектүү тарапка ок чыгарууну кабыл алды. Ал дагы атканда кайрадан үч ок чыгып, качканга тийип, аны өлтүрөт. Жалпысынан алты жолу ок атылды. Демек, милиция кызматкерлеринин аракети толугу менен мыйзамдуу болгон. Тилекке каршы, дароо эле «жеринде» жана жетишсиз маалымат менен болгон окуянын объективдүү сүрөтүн бириктирүү дайыма эле мүмкүн боло бербейт. Ошондуктан, мен башында күзөтчүлөр шалаакылык кылгандыр деген тыянакка келдим. Прокуратура дагы бул окуя боюнча иликтөө жүргүзүп, милиция кызматкерлеринин аракети мыйзам чегинде гана болгонун моюнга алат деп ишенем», — деп жазылат анын билдирүүсүндө.

Эске салсак, ИИМ Ак-Ордодогу эки адамдын өлүмүнө шектүү катары кармалып, качууга аракет кылып жок кылынган жарандын аты-жөнүн ачыктап, кылмыштын чоо-жайын баяндаган 11 мүнөттүк видео жарыялады. Милициянын 14-октябрда жарыялаган маалыматында айтылгандай, шектүүнүн аты-жөнү Ильясов Сапармурат Майрамбекович. Ал 2006-жылы төрөлгөн. Жайында Чолпон-Ата шаарында эс алуучу жайлардын биринде тейлөөчү болуп иштеп жүрүп, 27-сентябрда жумуштан бошотулган.

Андан кийин Бишкекке көчүп келип, шаардагы мейманканалардын биринде жашап жүргөн. Милиция шектүү акча каражаты түгөнгөндүктөн уурулук кылууну пландаганын белгиледи.

ИИМ шектүү базардан бычак алып жатканынан баштап, мейманканадагы видеолорунан бери көрсөттү. Шектүү ууруга кирүүнү болжоп койгон үйгө медициналык беткапчан кирген. Үй ээси ойгонуп кетип, ортодо кармаш чыккан. Экспертиза маркумга 18 жолу бычак сайылган деп эсептеген. Шектүүнү токтотууга аракет кылган эжесине 11 жолу бычак тийген.

Ак-Ордо-3 конушунда эки бир тууганды мыкаачылык менен өлтүргөн деген шек менен 19 жаштагы адам 7-октябрда кармалган. Бишкектин Биринчи май райондук соту 9-октябрда аны 3-декабрга чейин камакка алган.