Бүгүн, 14-апрелде, Кой-Таш окуялары боюнча соттук процесс учурунда Биринчи май райондук соттун судьясы Азирет Медеров Алмазбек Атамбаевдин ден соолугунун абалына баа бере турган соттук-медициналык экспертизаны дайындоо чечимин кабыл алды. Бул тууралуу Кундуз Жолдубаева маалымдады.
Ошону менен Кой-Таш окуялары боюнча соттук териштирүү экспертиза бүткөнгө чейин токтотулду.
«Ошондой эле, бүгүнкү соттук отурумда Равшан Жээнбеков болгон жок. Экс-депутаттын жактоочулары сотко анын ооругандыгы тууралуу маалымкатты көрсөтүштү, ал коронавирус жугузган болушу мүмкүн», — деди Жолдубаева.
Эске салсак, учурда Кыргызстандын мурунку президенти Алмазбек Атамбаев Кой-Таш окуялары боюнча жана 9-октябрда массалык баш аламандыктарды уюштургандыгы үчүн СИЗОдо камакта отурат. Азиз Батукаевдин мыйзамсыз бошотулушу боюнча Атамбаев 11 жылга кесилген.