Талас облусунун Бакай-Ата районуна караштуу Үйүр-Марал айылында майыптыгы бар кызды зордуктоого шектелип 42 жаштагы айылдашы кармалды. Бул тууралуу Талас ОИИБдин басма сөз кызматы кабарлады.
Маалыматка ылайык, милицияга жабырлануучу кыздын агасы арыз жазган. Ал арызда 18-апрель күнү биринчи топтогу майып, 30 жаштагы карындашынын алсыз абалынан пайдаланып, «Боди» аттуу киши зордуктаганга аракет кылганын жазган.
«Аталган билдирүү боюнча Бакай-Ата РИИБнүн жетекчилиги жана тергөө-ыкчам тобу тарабынан текшерүү жүргүзүлгөн. Шектүү катары Үйүр-Марал айылынын 1980-жылы туулган А.Н. аттуу тургуну аныкталган. Жабырлануучу соттук-медициналык экспертизадан өткөрүлгөн. Анын жыйынтыгы денесинде күч колдонулган жаракат белгилери жоктугун көрсөткөн. Факты «Кылмыш жасоого аракеттенүү» жана «Зордуктоо» беренеси менен кылмыш иши козголуп, шектүү убактылуу кармоочу жайга киргизилди»,-деп айтылат маалыматта.