Бишкек.10.06.2019.Govori.TV.
Ысык-Көлдө Ак-Суу аймактык ооруканасына тамак-ашка ууланган 19 киши кайрылды, алардын төртөө — балдар. Бул тууралуу Саламаттык сактоо министрлигинин маалымат кызматы билдирди.
Маалыматка ылайык, окуя 10-июнда катталган, кайрылган бейтаптар кыз узатуу тоюна барышканы белгилүү болгон.
«Кайрылгандардын бирөө кайта жандандыруу бөлүмүнө жаткырылса, 11 киши Ак-Суу райондук ооруканасынын жугуштуу оорулар бөлүмүндө. Жети киши амбулатордук дарыланууга чыгарылган», — деп айтылат маалыматта.
Учурда кайрылгандардын бардыгы дарыгерлердин көзөмөлүндө жана керектүү дары-дармек менен камсыздалган.
Бул окуянын негизинде текшерүү жүрүп жатканы жана анын жыйынтыгы менен кошумча маалымат берилээри кошумчаланды.
