Бишкектин Биринчи май райондук соту бүгүн, 15-февралда массалык башаламандык уюштурууга шек саналып кармалган Нурлан Асанбековдун үй камагындагы мөөнөтүн 20-апрелге чейин узартты.
Эске салсак, Нурланбек Асанбековдун үйүнө 2022-жылдын 23-октябрда тинтүү жүргүзүлүп, өзү кармалган. 24-октябрда Биринчи май райондук сотунун чечими менен эки айга №1 тергөө абагына камалган.
Өзүнө коюлуп жаткан күнөөлөр негизсиз экенин билдирген Асанбеков 1-ноябрдан тарта нааразылык иретинде ачкачылык жарыялаган. Кийин шаардык сот үй камагына чыгарган.
Кемпир-Абад суу сактагычына байланыштуу жыйындан кийин 23-24-октябрда жыйырмадан ашуун саясатчы, активист кармалган.
Ички иштер министрлиги аларды жапырт башаламандык уюштурууга аракет кылган деп айыптоодо жана жетиштүү далил бар экенин билдирген.