Иранда калган кыргызстандык айдоочулардын айрымдары Азербайжан аркылуу келгени жатышат. Бул тууралуу бүгүн, 11-марта Кыргызстандын Тышкы иштер министрлигинин маалымат кызматы кабарлады.
Мекеменин маалыматына караганда, кыргыз тарап Азербайжандын тийиштүү мекемелери менен сүйлөшүү жүргүзүп, транзиттик коридор сураган.
«9-мартка карата иран-азербайжан чек арасында жүк ташуучу 23 унаа бар болчу. 9-11-мартта «Астара» көзөмөл-өткөрмө пунктунда (азербайжан-иран чек арасы) 11 жүк ташуучу унаа өттү. Калган 12 айдоочу жана унаалар учурда паспорттук-бажы көзөмөлдөн өтүп жатышат»,-деп айтылат маалыматта.
Эске салсак, Иран-Түркмөнстан чек арасында коронавируска байланыштуу кыргыз айдоочулары карантинде камалып калган. Алар өлкө жетекчилигинен Ирандын аймагынан чыгарып кетүүнү суранышкан.