Баткенде 5 жаштагы Абидин Турсунбаевдин өлүмү боюнча териштирүү иши жүрүп жатат. Бул тууралуу Баткен ОИИБинин басма сөз кызматы билдирди.
Маалыматка ылайык, аталган кылмыш иши бүгүн, 3-майда Лейлек РИИБинин маалыматтардын электрондук журналына катталган.
«2021-жылдын 29-апрелинде Лейлек районунун Арка айылында тажик тараптан ок атылган учурда, ошол жердин жергиликтүү тургундары айылдан качып чыгышканда Арка-2 айылынын 2016-жылы туулган Абидин Турсунбаев аттуу тургуну айылдагы каналга түшүп кетип каза болгон. Бул факты 2021-жылдын 3-май күнү Лейлек РИИБинин маалыматтардын электрондук журналына катталып, азыркы күндө текшерүү иштери жүрүп жатат», — деп айтылат маалыматта.
Буга чейин социалдык тармактарга “Лейлек районундагы Арка айылында чек арадагы куралдуу кагылыштарда качып баратып Фергана каналына 5 жаштагы бала түшүп кетип каза болду” деген маалымат тараган.