Беткап тагынбай жана аралыкты сактабай жамаат менен бирге сүрөткө түшкөн өкмөт мүчөлөрү айыпка жыгылды. Экс-премьер-министр Мухаммедкалый Абылгазиевди узатуу салтанатындагы сүрөт үчүн жалпы 140 миң сом айып пул салынды. Бул тууралуу Бишкек шаарынын мамлекеттик санитардык-эпидемиологиялык көзөмөлдөө борборунан билдирди.
Бардыгы болуп 28 адам айып пул төлөйт, алардын ичинде:
– премьер-министр Кубатбек Боронов,
– экс-премьер-министр Мухаммедкалый Абылгазиев,
– вице-премьер-министр Аида Исмаилова,
– вице-премьер-министр Акрам Мадумаров,
– вице-премьер-министр Эркин Асрандиев,
– бөлүм башчылар жана башкалар.
Бузуулар кодексинин 150-беренесинин 1-бөлүмүнө ылайык ар бирине 5 миң сомдон айып тагылат. Жамааттык сүрөттө 124 адам түшкөн, анын ичинен экөөндө беткап бар.