Чек ара маселесин чечүүдө «Өзбекстан сууга көзөмөлдү алды» деген пикирлер туура эмес. Бул тууралуу депутат Умбеталы Кыдыралиев билдирди.
«Эки мамлекеттин ортосунда 12% чечилбеген маселе калган. Бүгүнкү күндө аталган көйгөйлөр боюнча сүйлөшүүлөр жүрүп, толугу менен чечилиптир. Эми эки тараптын делимитация маселелери болот. Жогорку Кеңеш ратификациялап берсе, демаркация иштери башталат. Жалпысынан кыргыз-өзбек чек ара маселеси чечилди десек болот. Мен чек ара маселесине байланыштуу убагында депутаттык комиссияны жетектегем. Өзбекстан сууга көзөмөлдү алды» деген пикирлер туура эмес»,-деди Кыдыралиев.
Эске салсак, Улуттук коопсуздук комитетинин төрагасы Камчыбек Ташиев 26-мартта басма сөз жыйын курган. Анда Өзбекстандагы чек ара боюнча сүйлөшүүлөрдүн жыйынтыгы тууралуу маалымат берип, Кыргызстан менен Өзбекстандын ортосундагы «чек ара маселеси 100%» чечилгенин айткан. Ташиев мындан ары ортодо талаштуу деген тилкелер болбой турганын белгилеген. Айрым эксперттер «Кыргызстанга айрым талаштуу жерлер өткөнү менен Өзбекстан сууга көзөмөл кылууга умтулуп жатат» деген пикирлерин айтып чыгышкан.