Жактоочу Икрамидин Айткуловго козголгон кылмыш иши Октябрь райондук сотуна өткөрүлүп берилди. Бул тууралуу бүгүн, 16-сентябрда Бишкек ШИИБдин басма сөз кызматы билдирди.
«Тергөө кызматы Жазык кодексинин 204-беренеси (алдамчылык) боюнча жүргүзгөн сотко чейинки өндүрүш иштин алкагындагы тергөө аяктап, кылмыш иштин материалдары сотко өткөрүлдү. Калган иштер боюнча сотко чейинки өндүрүш иш уланып жатат», — деп айтылат маалыматта.
Айткулов 22-августта кармалып, сурак бергенден кийин Бишкек ШИИБдин убактылуу кармоочу жайына киргизилген. 23-августта жактоочу Свердлов райондук соту тарабынан үй камагына алынган болчу.